៨១- កុំចេះតែចង់គ្មានប្លង់កុំទៅ

បានអានបានស្តាប់សារសព្ទវែងខ្លី           ពាក្យពេចន៍មាននយសម្តីទឹកឃ្មុំ

ផ្អែមល្ហែមរៀបរាប់បង្កប់អប់រំ                  ធម៌ព្រះពាក្យព្រហ្មចាស់ទុំទូន្មាន។

ថាកុំចង់បានរបស់ដែលអត់                   ហេតុមិនប្រាកដកុំចង់បំពាន

កុំជាប់ចិត្តនឹងរបស់ដែលមាន                 អ្វីទាំងប៉ុន្មានពុំមានខ្លឹមសារ។

ព្រោះអ្វីកើតឡើងមានហេតុបច្ចយ          ពេលហេតុអស់ថ្លៃរលត់សង្ខារ

កើតហើយអស់ទៅជារឿងធម្មតា            ជរាពិការជាអ្នកកំដរ ។

គ្មានអ្វីដែលល្អសម្រាប់យើងឡើយ       ជាងយើងនេះហើយដែលជាមនុស្សល្អ

ប្រព្រឹត្តបដិបត្តិតាមផ្លូវព្រះធម៌               ជីវិតបវរទទួលជោគជ័យ។

ជីវិតជាការតស៊ូប្រឹងប្រែង                      អប់រំខ្លួនឯងតាមធម៌វិនយ

កុំអស់សង្ឃឹមគិតតែពីភយ                    ត្រូវខំលកលៃតាមតួនាទី។

ជីវិតជាការប្រែប្រួលប្តូរផ្លាស់                  ពីក្មេងទៅចាស់ជរាញាំញី

ចុងក្រោយគឺស្លាប់ចោលលើប្រឹថពី          ចំណីធរណីចោលកូនរហង់ ។

ជីវិតប្រៀបដូចជាការដើរផ្លូវ                   ព្រះធម៌គង់នៅប្រៀបដូចជាប្លង់

ផែនទីនៅមានម្តេចមិនតម្រង់                 ដើរវិលឥតប្លង់កុំចង់ដល់ឆាប់។

ភ្លឺណាស់ច្បាស់ណាស់ព្រះសទ្ធម្មថ្លៃ        អស់ក្តីសង្សយក្រោយពីបានស្តាប់

ប្រៀបដូចបើកផ្ងាររបស់ដែលផ្កាប់           ឬដូចគេប្រាប់អ្វីដែលកំបាំង។

ដូចបង្ហាញផ្លូវដល់អ្នកវង្វេង                  ដែលដើរផ្សងព្រេងឱ្យដល់ទីតាំង

ឬដូចគេទ្រោលប្រទីបបញ្ចាំង                 ទីងងឹតខ្លាំងឱ្យមានរស្មី។

អ្នកមានភ្នែកភ្លឺអាចយល់សណ្ឋាន          មើលឃើញដឹងបានចម្រើនស្មារតី

គេចផុតវាលភក់នរកអវីចី                     ឆ្លងផុតទុក្ខភយអាស្រយធម្មយាន។

ខ្ញុំសូមប្រកាសសច្ចវាចា                         ថាបុណ្យនេះណាកើតព្រោះធម្មទាន

ដែលធ្លាប់បានស្តាប់មកទាំងប៉ុន្មាន         នាំចិត្តសន្តានឱ្យមានសទ្ធា។

សូមអនុមោទនាកុសល                         ឧទ្ទិសជូនផលដល់ញាតិគ្រប់គ្នា

មាតាបិតាគ្រូឧបជ្ឈាយ៍                          បងប្អូនមីងមាញាតិគ្រប់សន្តាន។

សូមឱ្យបានសុខសិរីសួស្តី                       ផុតទុក្ខផុតភ័យរកស៊ីមានបាន

សូមបុណ្យដែលខ្ញុំធ្វើទាំងប៉ុន្មាន             ជួយនាំរុញច្រានបានជួបធម៌ពិត។

បើមានគូគ្រងសូមគូដោយធម៌                បើមានកូនព សូមជាបណ្ឌិត

សូមជួបតែញាតិជាកល្យាណមិត្ត           សូមមានគំនិតគិតតែរឿងល្អ ។

គ្រប់ជាតិសូមជួបតែផ្លូវមានប្លង់              បុណ្យជួយតម្រង់ទានតាមកំដរ

បើមានភ្លាំងភ្លាត់សីលស្រង់បន្ត               សូមតោងព្រះធម៌លុះដល់និព្វាន។

ចាប់ពីបច្ចុប្បន្នជាតិនេះតទៅ                 សូមដើរតាមផ្លូវនៃព្រះទ្រង់ញាណ

ផ្លូវច្នៃបន្លំកុំឱ្យកើតមាន                         សូមដល់និព្វានកុំយឺតយូរឡើយ។

សូមអនុមោទនា!

ដោយឧបាសក គុយ  សុធន

(សៀវភៅមេរៀនជីវិត ទំព័រ ១២១)